A wannan shekarar, an samu ninkuwan adadin maziyartan Imam Husaini (AS) daga bangaren ‘yan uwa almajiran Shaikh Ibraheem Zakzaky (H), a lokacin taron Arba’een din shekarar 1445 (2023), a makwancinsa da ke Karbala.

Ziyarar Arbaeen din, wadda a kowace shekara ‘yan uwa sukan faro ne da yin Tattaki da kafafunsu tun daga birnin Najaf har zuwa Karbala. A wannan shekarar ma, ‘yan uwan sun faro Tattakin ne a safiyar ranar Alhamis 14 ga watan Safar, 1445, bayan shafe yinnai shida suna tafiyar kafa, suka isa haramin Imam Husaini (AS) da ke birnin Karbala da misalin karfe 10 na daren ranar Talata 19 ga Safar.

Wakilin Jagora Sayyid Ibraheem Zakzaky (H) a yayin Ziyarar ta bana, Shaikh (Dr.) Yusha’u Bin Shaikh, ya bayyana wa CIBIYAR WALLAFA cewa: “Daga Najaf, mun faro Tattakin ne da ‘yan uwan da ba su kai mutum 100 ba, kamar mutum 60 zuwa 70 ne a ranar farko da aka fara Tattakin da safe, amma zuwa yamma adadin ya karu, haka ma washe gari Juma’a adadin ya dada karuwa, haka ma ranar Asabar da Lahadi, kullum adadin na dada karuwa ne.

“Sai ya zama a ranar karshe (Talata) da muka iso Karbala, mun taso (mun nufi Harami) da ‘yan uwa kusan 700 ne, kafin mu shiga Harami kuma mutane suna ta shiga ciki, har aka kai mutane kamar 800 zuwa kusan 900. To kuma bayan mun shiga Harami ‘yan uwa sun sake karuwa sosan gaske a cikinmu, wadanda dukansu ‘yan Nijeriya ne, da suka hada da masu karatu a nan Karbala, da wadanda suke yi a Najaf, da wadanda suka zo daga Iran, da ‘yan sauran wurare, da kuma mu ‘yan Nijeriya da muka zo musamman saboda ziyarar.”

Ya cigaba da cewa: “Ko da yake, har ma da wasu ‘yan kasashen Afirka, musamman ‘yan kasashen Yammacin Afirka, sun zo sun jonu da tawagarmu ta almajiran Sayyid Zakzaky (H), don haka lokacin da muke shiga cikin Haramin, an yi kiyasin an shiga da mutane kusan mutum dubu daya ne. Wanda adadin ya karu a kan na shekarun baya da aka saba zuwa.”

Ba’adin ‘Yan uwa almajiran Shaikh Zakzaky (H) a cikin Haramin Imam Husaini (AS) a lokacin Arba’een din bana

Dr. Yusha’u ya kuma bayyana cewa: “Lokacin da muka zo shiga cikin Ataba, ana ta maganar cewa wai ba a shiga da hotuna ko alami na wani mutum (shaksiyya) ayyananniya, amma mu ko da muka shigo, muka doshi cikin Ataba din, muka je bakin Haramin, sai ga shi su da kansu (masu kula da wajen) suna kiran sunan Jagora, suna gaisuwa da jinjina ga ‘yan uwa a kan irin wannan salo da suka zo da shi a yayin wannan ziyarar tasu ga Abi Abdullah (AS).”

‘Yan uwa suna rike da hoton Jagora Shaikh Ibraheem Zakzaky (H) a cikin Haramin Imam Husaini (AS)

Yace: “Dama tun a kan hanya ma, idan muna tafiya, mukan ga idan an jero sunayen manya-manyan Malaman duniya, sai kaga an saka har sunan da Jagoranmu (H). Akan hanyar Najaf zuwa Karbala a wajaje daban-daban mun ga an rubuta sunan Jagora (da hotunansa). Kuma idan suka tashi rubutawa, ba kawai Shaikh suke sakawa masa ba, suna rubuta Ayatullah Shaikh Ibraheem Al-Zakzaky ne.” Yace, “Wannan wani abu ne da ke nuna girmamawa da karramawa ga su Jagora (Allah Ya kara musu lafiya da kariya).”

Nisan da ke tsakanin Najaf zuwa Karbala, tafiya ce ta kimanin Kilomita 78, sai dai kuma su ‘yan uwa sun faro Tattakin ne daga cikin garin Najaf, inda suka shafe wasu Kilomitoci kafin zuwansu inda ake fara kirga Kilomita, sannan kuma bayan isa Karbala, sun cigaba da tafiya da kafa har suka isa Harami, wanda haka yasa za a iya cewa, sun yi tafiya ne na kusan Kilomita 100 da kafarsu don wannan ziyarar.

“Duk da cewa, a wajen Tattaki ba ana kirga Kilomita ba ne, akwai abin da ake kirgawa, ana kirga Amudai ne, ‘Amudi’ kamar wani falwayar wutan lantarki ne, wanda ake sakawa tsakanin nan zuwa nan, su ne ake kira Amudai, kuma su ake kirgawa a matsayin nisan tafiya.” Inji Dr. Yusha’u.

Ya cigaba da cewa: “Amma dai kamar kirgenmu da muka saba na Kilomita, an ce tsakanin Najaf da Karbala kamar 78. To kuma kamar yadda na fada, idan aka hada da inda babu kirgan a Najaf, da kuma inda kirgan ya kare a Karbala, -inda babu Kilomita ko Amudai-, idan aka hada su za a kiyasta za su kai kilomita 10 zuwa 15, kuma idan muka dauka 15 din ne su, za mu ce an taka kusan kilo mita 100 a cikin wadannan yinnai guda shidan kenan.”

Dangane da shigar maziyartan ‘yan uwan cikin Haramin Imam Husaini (AS), Malam Yusha’u ya bayyana cewa: “Lokacin da aka bamu na shiga Harami karfe 10:00 na dare ne, amma sakamakon cinkoso da yawan mutane da aka samu, mun dade a kan layi kafin a kira mu, sai bayan karfe 11:00 na dare muka shiga cikin Haramin don sallama ga Imam Husaini (AS).”

Ya bayyana yadda tawagar ‘yan uwa ta ke tasiri ga tawagogi da sauran mutane da suka fito daga kasashe ta fuskaci daban-daban. Yace: “Idan suka ga tawagar ‘yan Nijeriya ne, tambayar da suke yi shine yaya Jagora yake? Ya Shaikh Zakzaky? Ya lafiyarsa? A wane hali yake ciki a yanzu? Da yawansu da sun gammu tambayarsu kenan akan Jagora da lafiyarsa da halin da yake ciki a yanzu haka. Bayan mun basu amsoshi, sai su yi ta yi masa addu’o’in samun lafiya da damar fita don zuwa neman lafiya a inda ya dace a kasar waje.”

Ya kuma bayyana yadda manyan Malamai daban-daban suke shaukin haduwa da Jagora (H), da yadda suke fatan Allah Ta’ala Ya bashi lafiya ta yadda wata rana zai samu halartan Ziyarar Haramin Imam Husaini (AS) a lokacin Arba’een musamman.

“Ataba Abbasiyya”, wadda ke kula da adadin masu shigowa ziyara a kowace shekara daga kasashen duniya, a bana ta bayyana fiye da mutum Miliyan 22 ne suka halarci taron Arba’een din Imam Husaini (AS) a Karbala.

Ga wasu daga hotunan Tawagar ‘Yan uwan a yayin da Ziyarar ta bana:

Cibiyar Wallafa

Cibiyar Wallafa

See author's posts