Tarihin Shahidan Harkar Musulunci
Shahid Ali Mu’azu
Shahid Ali Mu’azu, da ne ga Malam Mu’azu Ishaq Mai fata. Sunan mahaifiyarshi Maryam Dalhatu. Shi kani ne ga Shahid Muhammad Mu’azu.
An haife shi ranar 14 ga watan Afrilun 1999 daidai da 27 ga watan Zulhijja, 1419H a cikin Karamar Hukumar Sabon-Garin Zariya da ke jihar Kaduna. Kuma ya yi tsawon rayuwarsa tun daga haihuwan shi har zuwa shahadarsa tare da mahaifansa a gidansu da ke Unguwan Jaba da ke Sabon-Gari.
Shahid Ali ya fara karatun Addini ne a Markazu Shahid Abubakar Madomawa da ke Unguwan Jaba, sannan kuma ya yi Kismul Tahfizul Kur’anil Karim ta Malam Mustafa Kismi, daga karshe kuma ya koma Darul Imam Mahdi (A.F) da ke ‘Yan awaki Muciya, wanda a nan ne ya samu albarkacin sauke Alkur’ani mai girma.
A bangaren karatun boko kuwa, Shahid Ali ya yi daga ‘Nursery’ har zuwa kammala Firamare a makarantar Ar-Rayyan Islamic Nursery and Primary School. Daga nan aka saka shi a makarantar Demonstration Secondary School da ke cikin ABU Samaru, a nan ya yi daga JSS 1 zuwa JSS 3. Sai kuma ya koma Goodwill International school, inda ya daura daga SSS 1 har zuwa SSS 3, yana ajin karshe na kammala sakandiren ne ya riski shahada, a lokacin yana dan shekara 17 a duniya.
Duk da yake yaro ne a shekaru, Shahid Ali ya rungumi gyaran waya da Kwamfuta da wasu kayan lantarki a matsayin sana’arsa. Allah ya bashi hazaka ta yadda duk yana wadannan gyaran ne ba tare da ya taba zuwa wani waje ya koya ba. Bayan wannan kuma da yake shi mai sha’awar harkan kasuwanci ne, ya kasance ya kan saro layukan waya da irin su ‘memory card’ yana sayarwa.
Da yake duk mahaifansa ‘yan Gwagwarmaya ne tun kafin su haife shi, don haka Shahid Ali ya taso ne a cikin Gwagwarmayar yunkurin tabbatar da addinin Musulunci wanda Shaikh Ibraheem Zakzaky (H) ke jagoranta. Saboda haka, za a iya cewa tun daga haihuwarsa har zuwa shahadarsa ya yi su ne a cikin Gwagwarmayar addini.
Kanwarsa Fatima Mu’azu ta shaidawa CIBIYAR WALLAFA cewa: “Tun tasowar Shahid Ali sam bashi da wani buri da ya wuce ya rika aikin ba da kariya ga Jagoransa Sayyid Zakzaky Hafizahullah, da kuma kawo cigaba a cikin wannan Harka ta Musulunci. Don ganin hazaka da kokari irin nashi ne ma tun bai wuce shekaru 14 ba aka dauke shi a lajanar Mu’assasatu Abulfadl Abbas (AS), kuma duk da karancin shekarunsa ya bayar da gudummawa a Mu’assasar iyakar iyawarsa.”
Ta kara da cewa: “Ya kasance ya sadaukar da komai nashi ga wannan Harka, wanda ya hada da lokaci, dukiya da ma rayuwarshi gaba daya. Da yake suna ‘duty’ na ba da kariya ga Jagora (H) a gidan sa da ke Gyellesu, to ya kasance kusan can din ne ma ya koma kamar wajen da ya fi rayuwarsa, don duk lokacin da aka yi hutun makaranta to yana komawa can ne da zama baki daya.”
Shahid Ali baya ga wadannan ayyukan da yake na baiwa Harkar Musulunci gudummawa, har ila yau kuma ya rika ba da gudummawa wajen aikin yada sakon Harkar (media), musamman aikin mayar da jawaban Jagora (H) kwamfuta daga kaset mai zare. Sannan ya rika aiki da mawakan Wilayatul Haq, inda ya kan yi musu amshi wakokin gwagwarmaya da suke yi.
Fatima Mu’azu ta shaida mana cewa: “dama Shahid Ali na daya daga cikin wadanda aka raunata a harin da sojojin Najeriya suka kai ma muzaharar Qudus ta shekarar 2014. Sun harbe shi ne a hannun shi na hagu, wanda ya dauki tsawon fiye da watanni uku a asibiti yana jinyar hannun, a karshe kusan duka yatsun da suke hannun hagun nashi baya iya amfani da su yanda ya dac, amma wannan bai sa ya yi sanyi ko ya ja baya ba, sai ma kara kaimi da yayi, domin kuwa da samun saukin shi ya dawo ya cigaba da aikin ba da kariya ga Jagora (H). Kuma bayan aukuwar wannan (waki’ar Quds din) da shekara daya da ‘yan watanni kuma Allah Ta’ala Ya azurta shi da samun rabon shahada a gidan Jagora (H) a waki’ar Buhari ta 2015.”
‘Yan gidansu, sun shaide shi da dabi’un kamala da suka hada da dauriya, jarumta da kuma hakuri. “Ya kasance mutum me dauriya da hakuri, ba shi da yawan surutu, sannan yana da gaskiya da rikon amana, da kuma kyauta. Sannan ya kasance yana da sha’awar yin kasuwanci sosai, ba don komai ba sai dan ya dogara da kan shi kuma ya taimaki Addinin Allah.” Inji mahaifiyarsa.
Malama Hasana, ta kara da cewa: “Ali yaro ne mai kunya sosai, dan ko hada ido da mutane bai cika son yi ba, tun yana jariri yana da wata dabi’a; sam baya son wata ko wani su ga tsiraicinsa, tun lokacin bai iya magana ba idan ba wando a shi za ta ga ya takura sosai, har ya zo ya zama bayan bakin shi ya bude sai ya rika fada mata a saka mishi kaya. Haka kuma idan sun fita unguwa da shi ba ya taba yin abun da ya san cewa zai sa a cire ko a canja mishi kaya a cikin mutane, yana jira ne har sai sun koma gida sannan. Wannan dabi’ar ta kunya ta cigaba masa har zuwa girman shi, har shahadarsa.”
Ta cigaba da cewa: “Ali ya kasance yana da yawan fara’a da tausayin kannensa. Kuma ba shi da abokin fada sam, don haka ba a taba kawo karanshi wai cewa ga shi ya yi ba daidai ba. Mutum ne mai hazaka da fikira sosai, domin duk karatun da a ka yi masa a makaranta yana haddacewa ne, sau daya idan aka koya mai abu shikenan zai iya, don haka ko da yaushe yana zuwa na daya ne a ajin su. Kuma malamanshi ma sun shaidi cewa a aji sam ba ka jin surutu ko hayaniyarsa, amma da zaran an yi tambaya shi ke fara daga hannu ya bada amsa.”
Mahaifinsa Malam Mu’azu Ishaq ya shaidawa CIBIYAR WALLAFA cewa: “Gaskiya wannan yaro (Shahid Ali) bamu san komai a dangane da shi ba sai dai alkhairi, don gaskiya mutum ne mai kyawawan dabi’u da tausayi da biyayya a gare mu.”
Babban burin Shahid Ali Mu’azu a rayuwa shine ya wanzu cikin ba da kariya ga Jagoran Harkar Musulunci, kuma Allah Ya cika masa wannan burin a yayin da ya azurta shi samun shahada a gidan Sayyid Zakzaky (H) a yayin harin da sojojin Najeriya suka kai masa a waki’ar Buhari ta 2015, wacce ta kasance ranar 1 ga Rabi’ul Auwal din 1437H.
A ranan Asabar din (12/12/2015) da sojoji suka zo Husainiyyah lokacin shi ma Shahid Ali yana Husainiyyah din, sai aka saka shi ya raka su Shahid Sayyid Ali Haidar da Shahid Sayyid Humaid zuwa gida, tunda a lokacin can Gyallesu din lafiya lau ne, to haka ne yasa ya zama waki’ar ta riske shi a Gyallesu ne har ya samu rabon Shahada.
Mahaifansa sun shaida mana cewa, wata ‘yar uwa daga cikin wadanda ke gidan Shaikh Zakzaky a lokacin waki’ar, Amma Maryam Shelleng ta shaida musu cewa, daidai lokacin da sojoji suka hauro cikin gidan Sayyid Zakzaky (H) ne suka harbe shi a kai, lokacin yana tsaye daidai kofar da take kaiwa zuwa filin da lilo yake a gidan. Wannan kuma ya faru ne a ranan Lahadi, 13/12/2015.
Shahid Ali ya yi shahada ya bar mahaifansa biyu a raye, sai yayar shi guda daya mace, da kannen shi guda uku. Akwai yayan shi kuma Shahid Muhammad Mu’azu, wanda shi ya yi shahada ne tun ranan Asabar, tazarar kwana daya tsakanin Shahadarsu. Amincin Allah da yardarsa a gare su.
– Cibiyar Wallafa Da Yada Ayyukan Shaikh Zakzaky (H)
cibiyarwallafa@gmail.com
12/11/2022 (17/4/1444H).
Cibiyar Wallafa
Daga cikin tsayayyun Harisawa masu kula da hidimar Jagoran Harkar Musulunci, Shaikh Ibraheem Zakzaky (H) akwai Shahid Sulaiman Abdullahi, wanda ake masa lakabi da Injiniya.
An haifi Shahid Sulaiman ne a shekarar 1981, a garin Zariya da ke jihar Kaduna. Bayan fara tashinsa ba jimawa mahaifinsa ya rasu, sai aka saka shi a aikin koyon gyaran mota (Gareji).
Shahid Sulaiman ya fahimci Harkar Musulunci ne tun kafin waki’ar Abacha, ta sanadin yayanshi da Allah ya yi masa baiwar fahimtar Harkar tun da jimawa, sai ya rika yi ma kannensa karatun littafan addini kullum bayan sallar Asubah, cikinsu har da Shahid Sulaiman, wanda ta wannan dalilin ya fahimci Harka.
Kaninsa Malam Ayuba Abdullahi, ya shaidawa CIBIYAR WALLAFA cewa, rikon Shahid Sulaiman da gwagwarmaya da yadda ya bata lokacinsa, ya sa har garejin da yake aiki tare da cewa ya zama Oga a wajen, yana da masu kawo masa aiki sosai, amma bai cika samun zamansa ba, kusan ko yaushe yana wajen aikin Gwagwarmaya.
Yace: “Kuma yana ma aiki a wani Kamfani, amma sai da ta kai ma Kamfanin sun kira shi sun bashi zabi tsakanin aikin Kamfaninsu ko kuma aikin Gwagwarmaya, amma Shahid Sulaiman ya zabi aikin Gwagwarmaya.”
Ya kara da cewa: “Da yake lokacin waki’ar Quds na 2014 na samu rauni, sai wata rana yake min wasa cewa kai ka kama hanyar Aljanna ka dawo, amma ni idan na kama hanyar tafiya zan yi ba zan dawo ba. Kuma tun daga wannan lokacin na lura ya kara canza rayuwarsa, ya yawaita ibada da karatun Alkur’ani da kyautatawa, don haka Shahadarsa bata bamu mamaki ba.”
Shahid Sulaiman Haris ne, kuma yana cikin masu rakiya (escourt) din Jagora, Sayyid Zakzaky (H), shi ke lura da gyaran motocin gidan Malam ko idan za a yi tafiya. “Yana yawan rike babbar waya, saboda idan an yi tafiya da Jagora (H) wata mota ta kakare a hanya shi a kan barwa ya gyara ya taho da ita, to in abin zai ci kudi da yawa sai ya je ya sai da wayar tasa ya sai abin da zai gyaran in bai fi karfinsa bay a gyaro ya taho” Inji Malam Ayuba.
Yace: “Akwai wani tafiya da muka yi da shi zuwa Bidda, a hanyar dawowa motar ‘escourt’ daya ta lalace, sai aka tsaya aka bar masa motar don ya gyara, da yake Malam (H) ya tsaya a Dabai don ziyara, ana Dabai sai ga Shahid Sulaiman ya kariso da motar nan. Daidai za a bar Dabai sai motar da Jagora (H) ke ciki ta fara matsala, nan ma sai aka bar ma Shahid Sulaiman motar ya gyara ya taho da ita, muna kusa da Zariya sai gashi ya iso da motar ya gyarata, sai aka rika mamaki. Gaskiya Allah ya bashi wannan baiwar sosai.”
Shahid Sulaiman ya yi Shahada ne a garin Gabari, waki’ar da aka yi ranar Juma’a ana gobe za a yi waki’ar Buhari. Waki’ar da masarautar Zazzau ta shirya shi, ta tura ‘yan tauri su dira a kan ‘yan uwa almajiran Shaikh Zakzaky na garin Gabari.
Kaninsa Ayuba ya bayyana yadda Shahadarsa ta kasance. Yace: “Muna tare da shi a ranar Juma’a 11/12/2015 da safe, sai na ga kwayar idanunsa sun zama farare tas, muna magana da shi sai yake ce min, idan na ji an kira kan batun zuwa Gabari a sanar da shi, can da yamma sai aka fada min abin da ke faruwa a Gabari din, sai na kira shi, yace na jira shi. Bayan ya fito mun shiga mota, yana gaba ina baya, sai na ga ya waigo ya kalleni, sai muka hada ido muka yi dariya. Mun isa yamma ta yi sosai, lokacin masu harin ‘yan uwa sun yi galaba sosai a kansu, amma dama hadafin zuwanmu shine taimakon ‘yan uwan da aka dirawa.
“Muna zuwa, sai Shahid Sulaiman ya rika kokarin kora masu harin da kokarin kange su daga saran ‘yan uwa. Har nake ce mas aka daina shigewa mutanen nan don baka san wajen nan ba, ni na san illarsu, gashi bamu da yawa. Ai muna cikin maganar nan ma suka karo karfi suka kewaye mu, suka fara dukanmu da sanda da sara da takobi da jifa da duwatsu da sauransu, ana haka ne suka jefi Shahid Sulaiman a fuska da dutse ya fadi, sai kawai suka hau shi da sara. Ni ma a lokacin ne suka sare min yatsu suka fara lilo duk muka kwanta.
“Can da na mirgina na tashi, sai na ga shi sun zagaye shi suna saransa, a daidai lokacin ina nunfashi da kyar ba taimakon da zan iya masa, karshe nima sai wasu ‘yan uwa ne suka iya kawo min dauki suka dauke ni. A wannan lokacin suka shahadantar da Shahid Sulaiman.” Inji Ayuba.
Injiniya Sulaiman ya yi Shahada ya bar mata daya da yaya hudu, bayan shahadarsa ba jimawa aka haifa masa na biyar.
Ayuba ya kuma shaida mana cewa da yake sun shaku sosai da Shahid Sulaiman, kasancewar shi ke binsa a dakinsu, don haka kamar ya fi kowa jin radadin rashinsa, “Na sha na kasa bacci saboda tunaninsa, amma in baccin ya dauke ni sai na ganshi a mafarki yana bani hakuri, wani lokaci ya ce min na rika karanta masa suratul Khauthar. Nace masa wadanda suka maka wannan aikin fa? Sai yace min na rika karanta musu suratul Fiyl akan Allah ya dauka min fansa a kansu.” Inji shi.
Allah Ya girmama matsayinsa, Ya tsinewa makasansa albarka.
Cibiyar Wallafa
Shahid Mahmud Ibrahim Yusuf yaro ne dan shekaru 16 a duniya a sadda ya yi Shahada, domin kuwa an haife shi ne a ranar 14 ga Disambar 1999, daidai da 5 ga watan Ramadan 1420H a garin Gwarzo da ke jihar Kano.
Yayansa Malam Tahir Ibrahim (Gwarzo) ya shaidawa CIBIYAR WALLAFA cewa: “Da yake shi mahaifinmu Alaramma ne, yana da makarantar Tsangaya na karatun Alkur’ani da almajirai, to duk yawanci da muka taso karatun Qur’ani ne a ke farawa a gida, don haka shima Mahmud karatun Qur’ani ya fara yi tun tasowarsa din.”
Ya ce: “bayan karatun Mahmud ya dan fara yin nisa a gaban mahaifin namu, a lokacin yana zaune ne a garin Gwarzo ta jihar Kano, sai wani dalili ya sa mahaifin namu ya baro Gwarzo ya dawo wani kauye nan cikin Igabi ta jihar Kaduna da zama, don haka dawowarsa sai na ga dacewar ni kuma na dawo da yaron gidana a nan Zariya.”
Ya cigaba da cewa: “bayan da aka dawo da shi Zariya, sai muka saka shi a makarantar Fudiyya, ya zama yana yin bangaren Firamare da kuma bangaren haddar Alkur’ani Mai Girma, wanda kuma yana aji uku ne (JSS-3) ya yi Shahada.”
Malam Tahir, ya shaidi Shahid Mahmud da kamewa daga shiga abin da bai shafe shi ba. “Idan yana waje in dai ba wani abu da aka sako shi ya yi magana ba, sam ko a cikin yara ba ka jin hayaniyar Mahmud. Kuma lallai ba mu san wani abokin fada ko a kawo karansa a ce ya yi fada da wani ba sam shi.
Yace, Mahmud ya kasance mai mayar da hankali sosai a kan karatunsa. “Har ma na san lokacin ya yi min alwashin cewan insha Allahu kafin shekara mai zuwa yana fatan da shi za a yi bikin yayen Mahaddata wanda za’a yi a nan Fudiyya ta Zaria. Amma Allah bai kai ga cika masa wannan burin ba ya azurta shi da kyakkyawar rabo na shahada.”
Malam Tahir ya bayyana cewa: “A lokacin da Mahmud ya yi Shahada duk mahaifansa biyu suna raye, ita mahaifiyarshi ma a lokacin shahadansa na san ni kaina da nake magana lokacin ina kwance a asibiti a Kano, sakamakon harbin da aka yi min a waki’ar, ta rika zuwa wajena ta gaishe ni har kusan sau uku, amma zuwa biyu ba ta tambaye ni labarinsa ba, sai a zuwanta na uku take tambayata ko akwai labarin Mahmud? Sai nace mata har yanzu bamu da labarinsa. Sai na ga ta yi shiru ta dukar da kai tana jan carbinta. Sannan tace min, Insha Allah in yana raye Allah ya bayyanar mana da shi kuma Allah ya bi masa hakkinsa. Ta yi ta addu’a a kan zaluncin da a ka yi mata.”
Ya ce: “matsayar mahaifinsu kuwa, lokacin da aka ce masa an kashe su, abin da ya ke cewa shine, ya tabbatar dansa addini ya ke yi, idan ya dawo ko ma in bai dawo ba, shi ya tabbatar ɗansa idan an kashe shi to an kashe shi ne a kan addini, don haka bai da damuwa.”
Yayarsa, Malama Zulaiha Ibrahim, ta labarta mana cewa: “ana saura ‘yan kwanaki zai yi shahada, bayan mun fito daga Fudiyya akwai wata jaka a hannusa da nace ya bani ina sonta. Sai yace ba zai bani ba, sai ya yi shahada. Yace idan ya yi shahada sai na je na ɗauka. Sai nace masa kai ne za ka yi shahada a hakan nan? Sai yace min to na tsaya na gani, in saurare shi na gani. Nace to Allah ya nuna mana.”
Tace: “To kawai an yi hakan da kwana biyu sai ga waki’a. To ranar waki’ar mun fito daga Fudiyya aka ce kar kowa ya fita. Sai yace shi gaskiya ba zai tsaya jira har sai an ba shi umarni sannan zai je ya ba jagora kariya ba. Sai nace masa ka bari kar ka fita. Sai yace shi lallai ba zai tsaya ba ya riga ya yi gaba. Sai nace masa to shikenan Allah ya taimaka. Yace amma dai a yayyafi juna. Sai nace Insha Allah.”
Ta cigaba da cewa: “bayan mun fito ne, su sun riga sun yi gaba, sai muka tafi Gyallesu muma. Shi Gyallesu ko Husainiyya ya tafi kai tsaye ban sani ba, amma da muka je Gyallesu, da yake an yi azumi, sai aka ce ya kawo mana abinci na je na amsa. Sai nace wata kawata ta je ta amso mana, sai ya zama dai karshen ganina da shi tun a Fudiyyah din nan ne, shikenan har yau da muke wannan maganar.”
Malam Tahir Ibrahim yace: “Bayan an tashe su daga Fudiyyah, wasu dalibai sun tafi Husainiyyah, wasu kuma suka nufi Gyallesu, to shi Shahid Mahmud na cikin wadanda suka tafi Gyallesu din, da yake yana aiki tare da ‘yan Abul Fadlul Abbas (AS), to kuma daga cikinsu wasu sun bani labarin cewa sun ga lokacin da aka harbe shi. An harbe shi a kirji har ma an ce wurin ya bude, kuma an ce an ga lokacin da aka dauke shi aka shigar da shi gidan Harisawa lokacin yana irin kakarin kamar zai yi Shahada haka a ranar Lahadi (13/12/2015) da safe.”
Allah Ya karbi Shahadarsu. Ya girmama matsayinsu. Ya tsinewa makasansu albarka.
Cibiyar Wallafa
Shahid Faisal Abdulkadir Gilima, daya ne daga matasa masu kokari, wadanda suke bayar da gudummawa ga Harkar Musulunci a Nijeriya a bangaren Mu’assasar Abul Fadl Abbas (RA).
An haif Faisal ne a garin Mubi ta jihar Adamawa, a ranar Laraba 15/5/1991 (daidai da 1 ga Zulkida, 1411H). Kasancewar mahaifiyarsa kanwa ce shakikiya a wajen dan uwa Engr. Yahya Gilima, don haka bayan rasuwar mahaifinsa a lokacin yana dan shekaru kimanin 12, sai ya dawo gidan Alhaji Gilima da rayuwa.
Lokacin da mahaifinsa ya rasu, bai kammala makarantar Firamare ba, don haka sai mahaifiyarsa Malama Amina ta tsaya a garin Mubi har sai da ya kallama Firamaren, sannan sai ta dawo wajen dan uwanta a Kaduna, inda ta danka masa rikon dan nata tun yana da shekaru 12 har zuwa lokacin da ya yi Shahada a ranar 13/12/2015 a Zariya, lokacin yana da kimanin shekaru 24 a Duniya.
Marikiyarsa, wacce ta mayar da shi tamkar daya daga ‘ya’yan da ta haifa, wato Malama Jummai Ahmad Karofi, ta bayyanawa Cibiyar Wallafa cewa; “Bayan ya dawo hannunmu da shaidar gama Firamarensa, sai muka saka shi a makarantar Sakandire mai suna Destiny School da ke unguwar Malali a Kaduna. Bayan ya kammala aji ukunsa a nan, sai muka komar da shi makarantar Federal Government College Kaduna, inda ya kammala karatun Sakandirensa a nan.”
Ta cigaba da cewa: “Daga nan, an nema masa ‘admission’ a Kaduna State Polytechnic, inda aka bashi ‘course’ din Lab Technology, amma sai ya nuna rashin sonsa ga wannan fagen, don haka daga sai muka bar shi da zabinsa, daga baya shi da kansa ya nema wa kansa ‘admission’ a Jami’ar KUDS Wudil ta jihar Kano, inda ya karanta Geography. Kuma yana ajinsa na karshe (400l) aka yi waki’ar Zariya, a lokacin ya gama karatun ma, yana kan rubuta ‘Project’ ne, suka tafi Zariya, inda kuma shikenan.”
Ta bayyana shi a matsayin yaro mai riko da addini, musamman saboda yadda ya shaku da yaronta mai suna Ibraheem, wanda shi ma ya kasance mai kokarin aikata addini tun suna yara, don haka sai ya zama Faisal na kokarin ganin ya yi koyi da yayansa Ibraheem a fagen ibada da kokari.
Tace, tun farkon assasa Mu’assasatu Abul Fadl Abbas a Zariya, da nufin taimakawa Jagoranmu Shaikh Ibraheem Zakzaky (H), a ranar da aka yi taron assasata, a ranar ta yi magana da shugaban Mu’assasar, Sayyid Shahid Ahmad Zakzaky, inda ta bukaci a sanya ‘ya’yanta guda biyu; Faisal Abdulkadir da yayansa Khalid Yahya Gilima su zama daga mambobin Mu’assasar.
An shaidi Shahid Faisal da kokarin neman na kansa da rashin kasa. “Ya kasance yaro mai kokari da son neman na kansa, domin ko a sadda ya ke karatun jami’a ya kasance yakan saro yadiddika ya bada a dinka masa sun a maza, yana saidawa.” Inji Hajiya Jummai.
Faisal ya tafi Zariya tare da ‘yan uwansa hudu a lokacin waki’ar Buhari ta 12/12/2015, inda kuma tun daga ranar Lahadi 13 ga Disambar 2015 ba a sake jin labarinsa ba, don haka ana kaddara cewa yana daya daga cikin daruruwan Shahidan da sojojin Buhari suka Shahadantar a Zariya.
Cibiyar Wallafa
-
Makaloli12 months agoLabarin Fitina Tawayiyya A Takaice
-
Labarai3 months agoJagora Shaikh Ibraheem Zakzaky Ya Isa Birnin Karbala
-
Labarai5 months agoAn Yi Taron Bikin Idil Ghadir A Abuja
-
Labarai5 months agoJagora Sayyid Zakzaky (H) Ya Yanka Ragonsa Na Layya
-
Bidiyo6 months agoShaikh Zakzaky Ya Yi Ta’aziyyar Shahadar Shugaban Iran, Ebraheem Ra’isi
-
Labarai6 months agoJagora Sheikh Zakzaky (H) Ya Gana Da Dandalin Ɗalibai A Ranar Tunawa Da Imam Khomeini
-
Labarai6 months agoA Yayin Bikin Tunawa Da Auren Imam Ali (As) Da Sayyida Zahra (As), Jagora Sheikh Zakzaky (H) Ya Gana Da Dandalin Matasan Sharifai
-
Labarai3 months agoYadda Jagora Shaikh Zakzaky Ya Yi Musharaka Da ‘Yan Uwa A Yayin Tattakin Arbaeen Zuwa Karbala