Tarihin Shahidan Harkar Musulunci
Shahid Muhammad Kabir Alkanawi
Cikin Malaman Harkar Musulunci, wadanda Allah Ta’ala ya rabauta su da samun Shahada a waki’ar Buhari ta 2015 a Zariya, akwai Malam Muhammad Kabir wanda ake masa lakabi da “Alkanawi”.
Mai dakinsa, Malama Hasana Lawal, ta bayyanawa CIBIYAR WALLAFA cewa, an haifi Shahidin ne a unguwar Gwammaja da ke cikin birnin Kano a ranar Lahadi 30 ga watan June, 1963 (wanda ya yi daidai da 8 ga watan Safar, 1383H).
Tace, ya yi karatun Firamare da Sakandirensa duk a Karamar Hukumar Gwale ta jihar Kano. Daga baya ya samu gurbin karatu a jami’ar Ahmadu Bello da ke Zariya, wanda bayan fara karatu a fannin Polymer/Textile Engineering, suna cikin karatun kafin su gama aka sallame su, sakamakon wasu abubuwa da suka faru da ya shafi gwagwarmayar addini a lokacin. Bayan barinsu Jami’ar Ahmadu Bello, daga baya Malam Muhammad Kabir ya samu dama, inda ya tafi makaranta ya yi karatun addini a kasar Sudan.
Malam Muhammad Kabir ya fahimci Harkar Musulunci ne a jami’a a wajajen tsakiyar shekarun tamaninoni, lokacin yana matsayin dalibi. Kuma tun daga wannan lokacin ya cigaba da gwagwarmayar addini har zuwa karshen shekarar 2015 da sojojin Nijeriya suka Shahadantar da shi.
Shahid Kabir AlKanawi (da hula), tare da Shaikh Ibraheem Zakzaky (H) a shekarun baya.
Ta bangaren iyali, Shahid Alkanawi yana da mata daya ce, wanda suka haifi ‘ya’ya 11 da ita; mata shida da maza biyar, sai dai kafin Shahadarsa biyu daga cikin ‘ya’yan sun rasu, inda ya tafi ya bar ‘ya’ya tara a raye.
Kafin dawowarsa Zariya da zama baki daya, Malam Kabir Alkanawi ya zauna a Kano, inda har ya rike Amirancin ‘yan uwa na Kanon na tsawon shekaru. Kuma a nan ne ma ya yi aure.
Mai dakinsa, Malama Hasana ta shaidi halinsa da cewa: “rayuwarsa shi abin tausayawa ne da wannan, gaskiya ni lokacin da mu ka yi aure da shi shekaruna ba su da yawa, amma a tsawon wadannan shekarun da muka yi na shaide shi da yana da gaskiya da tausayi da rikon amana da sadar da zumunci.”
Ta cigaba da cewa: “Yana da tausayawa kananan yara da mata, don a rayuwar da na yi da shi, tun kafin ma ya fara samun yara, da yake akwai wata yarinyar kanwar shi da muka rike, ni tun zamana da shi yarinyar nan ko wane irin abu za ta yi bai taba saka hannu ya dake ta ba. Haka kuma yaransa da ya haifa su ma bai taba dukansu, sai dai ya yi musu nasiha idan sun yi laifi.”
Tace: “Kyawawan dabi’u da kulawarsa ta sa yawanci ayyukan gida ma shi yake yi, har wani lokaci ma idan nace ya bari mana zan yi wannan. Sai yace, a’a shi dai zai. Wani lokaci ma ina kwance abubuwan da ya kamata ace mace ne za ta yi, amma shi ya ke yin su kafin na tashi.”
Ta kara da cewa: “Ta fuskacin rikon amanarsa kuwa, ko da zai zama gida babu abin cefane baya iya taba kudin mutane da ke wajensa, sai dai yace mu yi hakuri, amma ba ya iya tabawa, ga kudi da yawa za ka gani a wajensa, amma zai ce ba zai taba wannan kudin ba, domin na al’umma ne.”
Babbar ‘yar Shahid Muhammad Kabir, mai suna Fatima, ta shaidawa CIBIYAR WALLAFA cewa: “(Mahaifinta) yana da mu’amala mai kyau da mutane, musamman ma ta fuskacin rikon amana, tun da a kafin Shahadarsa shine kamar “Mudir” na Islamic Center, to ko wani kudi ne in aka tashi taro shi a ke baiwa su, a matsayinsa na wanda aka ba mas’uliyar kula da wajen, to ko ya zo da kudin gida ne, ko da bai da wani kudin sai su, kuma akwai bukatar amfani da su, sam ba zai iya taba wannan kudin na Islamic Center ba, tunda daman kudin jama’a ne. Don haka ko wace bukata yake da ita, ya kan iya hakuri har sai ya samu kudinsa na kansa kafin ya biya ta.”
Tace: “Ta bangaren zumunci kuwa, shi yana da yawan zumunci, kowa nashi ne, ko da kuwa kai makiyin shi ne zai ziyarceka saboda ya sada zumunci da kai. Sannan kuma yana da girmama mutane, hatta wadanda ya fi su shekaru ko ilimi da sauransu, tunda yawanci wadanda na ke ganin suna tare da shi lokacin za ka ga ma samari ne, amma ba zai nuna wai girman kai ba ko ya ji cewa wannan karamin yaro ne, kowa yana zama tare da shi su yi mu’amala.”
Fatima ta kara da cewa: “Mun godewa Allah sosai, tunda a rayuwarmu da shi ko abu ne muke bukata idan muka tambaye shi baya taba ce mana babu kai tsaye, ko da kuwa bashi da shi din ne, to zai yi mana magana mai dadi ne, ya kuma ce mana idan ya samu zan yi muku insha Allah. Sannan kuma ko laifi yaro ya yi a gida bai taba dukan shi ba sai dai ya yi masa nasiha ko ya yi barazanar kamar zai dakeka din hark a tsorata ka bari, amma dai bai taba duka ba gaskiya.”
Lokacin da matsaloli suka yawaita a Kano a karshen shekarar tis’inoni, sai Jagoran Harkar Musulunci, Shaikh Ibraheem Zakzaky (H) ya tura Malam Muhammad Mahmud Turi a matsayin wakilin ‘yan uwa na Kano, sai ya dawo da Malam Kabir Kanawi Zariya, inda ya cigaba da kula da Cibiyar Fudiyya (Fudiyyah Islamic Center) da ke Danmagaji a Zariya.
Sai ya zama Malam Kanawi ya cigaba da kula da wannan Cibiyar, wacce a cikinta akwai dakin karatu, da wajen tarurrukan ilimi, kuma a nan ne Jagora (H) ya fara gabatar da karatun Tafsirin Alkur’ani da Nahjul Balagha da Majlisosin karatu da Daurori da sauran tarurrukan Harkar Musulunci kafin a samar da Husainiyyah Bakiyatullah.
Baya ga kula da wannan wajen da yake yi, ya cigaba da koyarwa a makarantar Fudiyyah da ke Zariya, har da bangaren kananan yara. “Har ma mutane suna mamaki a lokacin da yake koyarwar, idan suka ga yana fama da yara suna ta surutu a aji ko wasa, amma ba ya iya dukansu sai dai ya masu nasiha.” Inji Matarsa.
Tace: “Wasu lokuta zai dawo gida yace kansa yana ta ciwo, yace saboda hayaniyar yara shi kuma ba zai iya dukansu ba. Yakan ce, shi yaro ana yi masa nasiha ne ba duka ba in dai ana son a tarbiyantar da shi ne.”
Da take bayani dangane da shahadarsa kuwa, Malama Hasana ta shaidawa CIBIYAR WALLAFA cewa: “Na san ya fita a ranar Waki’ar (12/12/2015) sun tafi yin sallar Magribaini a gidan Malam Zakzaky (H), ya dawo wajen karfe 9nd ya dauki abinci da bargo da tabarmi don ya kai ma bakin da suka zo daga garuruwa su yi amfani da su. Da ya kai masu kuma sai ya kara dawowa gida, ya zo ya yi sallah, ya yi addu’o’i, ya ajiye kwamfiyutarsa a gidan sai ya koma Gyallesu (gidan Malam). To tun daga nan dai rabuwarmu da shi.”
Tace: “Da Asubahin ranar Lahadi ya kirani, yace ga fa halin da suke ciki a saka su a cikin addu’a domin maharani nan suna nufin Malam ne kawai, sai dai Allah Ta’ala ya bamu sabati. To daga nan dai bai kara kirana ba sai wurin 11ns a ranar, lokacin ma gaskiya ina jin karan harbi, yake cewa ga su nan fa sun riga sun shigo gidan Malam (H), sai dai a yafe masu a taimaka masu da addu’a kuma Allah ya bamu sabati gaba daya. Tun daga nan ban kara jinsa ba kuma, tun da ko an kira wayar ma baya shiga.” Inji Malama Hasana.
Ta kara da cewa: “Gaskiya dai tun daga wannan lokacin ba mu sake jinsa ba, kuma dai ba mu samu wani da ya zo ya tabbatar mana da cewa ya ga sadda aka harbe shi ko wani abu mai kama da hakan ba, ni dai a ta bangare na.”
– Cibiyar Wallafa Da Yada Ayyukan Shaikh Zakzaky (H)
Email: cibiyarwallafa@gmail.com
11/11/2022 (16/4/1444)
Cibiyar Wallafa
Daga cikin tsayayyun Harisawa masu kula da hidimar Jagoran Harkar Musulunci, Shaikh Ibraheem Zakzaky (H) akwai Shahid Sulaiman Abdullahi, wanda ake masa lakabi da Injiniya.
An haifi Shahid Sulaiman ne a shekarar 1981, a garin Zariya da ke jihar Kaduna. Bayan fara tashinsa ba jimawa mahaifinsa ya rasu, sai aka saka shi a aikin koyon gyaran mota (Gareji).
Shahid Sulaiman ya fahimci Harkar Musulunci ne tun kafin waki’ar Abacha, ta sanadin yayanshi da Allah ya yi masa baiwar fahimtar Harkar tun da jimawa, sai ya rika yi ma kannensa karatun littafan addini kullum bayan sallar Asubah, cikinsu har da Shahid Sulaiman, wanda ta wannan dalilin ya fahimci Harka.
Kaninsa Malam Ayuba Abdullahi, ya shaidawa CIBIYAR WALLAFA cewa, rikon Shahid Sulaiman da gwagwarmaya da yadda ya bata lokacinsa, ya sa har garejin da yake aiki tare da cewa ya zama Oga a wajen, yana da masu kawo masa aiki sosai, amma bai cika samun zamansa ba, kusan ko yaushe yana wajen aikin Gwagwarmaya.
Yace: “Kuma yana ma aiki a wani Kamfani, amma sai da ta kai ma Kamfanin sun kira shi sun bashi zabi tsakanin aikin Kamfaninsu ko kuma aikin Gwagwarmaya, amma Shahid Sulaiman ya zabi aikin Gwagwarmaya.”
Ya kara da cewa: “Da yake lokacin waki’ar Quds na 2014 na samu rauni, sai wata rana yake min wasa cewa kai ka kama hanyar Aljanna ka dawo, amma ni idan na kama hanyar tafiya zan yi ba zan dawo ba. Kuma tun daga wannan lokacin na lura ya kara canza rayuwarsa, ya yawaita ibada da karatun Alkur’ani da kyautatawa, don haka Shahadarsa bata bamu mamaki ba.”
Shahid Sulaiman Haris ne, kuma yana cikin masu rakiya (escourt) din Jagora, Sayyid Zakzaky (H), shi ke lura da gyaran motocin gidan Malam ko idan za a yi tafiya. “Yana yawan rike babbar waya, saboda idan an yi tafiya da Jagora (H) wata mota ta kakare a hanya shi a kan barwa ya gyara ya taho da ita, to in abin zai ci kudi da yawa sai ya je ya sai da wayar tasa ya sai abin da zai gyaran in bai fi karfinsa bay a gyaro ya taho” Inji Malam Ayuba.
Yace: “Akwai wani tafiya da muka yi da shi zuwa Bidda, a hanyar dawowa motar ‘escourt’ daya ta lalace, sai aka tsaya aka bar masa motar don ya gyara, da yake Malam (H) ya tsaya a Dabai don ziyara, ana Dabai sai ga Shahid Sulaiman ya kariso da motar nan. Daidai za a bar Dabai sai motar da Jagora (H) ke ciki ta fara matsala, nan ma sai aka bar ma Shahid Sulaiman motar ya gyara ya taho da ita, muna kusa da Zariya sai gashi ya iso da motar ya gyarata, sai aka rika mamaki. Gaskiya Allah ya bashi wannan baiwar sosai.”
Shahid Sulaiman ya yi Shahada ne a garin Gabari, waki’ar da aka yi ranar Juma’a ana gobe za a yi waki’ar Buhari. Waki’ar da masarautar Zazzau ta shirya shi, ta tura ‘yan tauri su dira a kan ‘yan uwa almajiran Shaikh Zakzaky na garin Gabari.
Kaninsa Ayuba ya bayyana yadda Shahadarsa ta kasance. Yace: “Muna tare da shi a ranar Juma’a 11/12/2015 da safe, sai na ga kwayar idanunsa sun zama farare tas, muna magana da shi sai yake ce min, idan na ji an kira kan batun zuwa Gabari a sanar da shi, can da yamma sai aka fada min abin da ke faruwa a Gabari din, sai na kira shi, yace na jira shi. Bayan ya fito mun shiga mota, yana gaba ina baya, sai na ga ya waigo ya kalleni, sai muka hada ido muka yi dariya. Mun isa yamma ta yi sosai, lokacin masu harin ‘yan uwa sun yi galaba sosai a kansu, amma dama hadafin zuwanmu shine taimakon ‘yan uwan da aka dirawa.
“Muna zuwa, sai Shahid Sulaiman ya rika kokarin kora masu harin da kokarin kange su daga saran ‘yan uwa. Har nake ce mas aka daina shigewa mutanen nan don baka san wajen nan ba, ni na san illarsu, gashi bamu da yawa. Ai muna cikin maganar nan ma suka karo karfi suka kewaye mu, suka fara dukanmu da sanda da sara da takobi da jifa da duwatsu da sauransu, ana haka ne suka jefi Shahid Sulaiman a fuska da dutse ya fadi, sai kawai suka hau shi da sara. Ni ma a lokacin ne suka sare min yatsu suka fara lilo duk muka kwanta.
“Can da na mirgina na tashi, sai na ga shi sun zagaye shi suna saransa, a daidai lokacin ina nunfashi da kyar ba taimakon da zan iya masa, karshe nima sai wasu ‘yan uwa ne suka iya kawo min dauki suka dauke ni. A wannan lokacin suka shahadantar da Shahid Sulaiman.” Inji Ayuba.
Injiniya Sulaiman ya yi Shahada ya bar mata daya da yaya hudu, bayan shahadarsa ba jimawa aka haifa masa na biyar.
Ayuba ya kuma shaida mana cewa da yake sun shaku sosai da Shahid Sulaiman, kasancewar shi ke binsa a dakinsu, don haka kamar ya fi kowa jin radadin rashinsa, “Na sha na kasa bacci saboda tunaninsa, amma in baccin ya dauke ni sai na ganshi a mafarki yana bani hakuri, wani lokaci ya ce min na rika karanta masa suratul Khauthar. Nace masa wadanda suka maka wannan aikin fa? Sai yace min na rika karanta musu suratul Fiyl akan Allah ya dauka min fansa a kansu.” Inji shi.
Allah Ya girmama matsayinsa, Ya tsinewa makasansa albarka.
Cibiyar Wallafa
Shahid Mahmud Ibrahim Yusuf yaro ne dan shekaru 16 a duniya a sadda ya yi Shahada, domin kuwa an haife shi ne a ranar 14 ga Disambar 1999, daidai da 5 ga watan Ramadan 1420H a garin Gwarzo da ke jihar Kano.
Yayansa Malam Tahir Ibrahim (Gwarzo) ya shaidawa CIBIYAR WALLAFA cewa: “Da yake shi mahaifinmu Alaramma ne, yana da makarantar Tsangaya na karatun Alkur’ani da almajirai, to duk yawanci da muka taso karatun Qur’ani ne a ke farawa a gida, don haka shima Mahmud karatun Qur’ani ya fara yi tun tasowarsa din.”
Ya ce: “bayan karatun Mahmud ya dan fara yin nisa a gaban mahaifin namu, a lokacin yana zaune ne a garin Gwarzo ta jihar Kano, sai wani dalili ya sa mahaifin namu ya baro Gwarzo ya dawo wani kauye nan cikin Igabi ta jihar Kaduna da zama, don haka dawowarsa sai na ga dacewar ni kuma na dawo da yaron gidana a nan Zariya.”
Ya cigaba da cewa: “bayan da aka dawo da shi Zariya, sai muka saka shi a makarantar Fudiyya, ya zama yana yin bangaren Firamare da kuma bangaren haddar Alkur’ani Mai Girma, wanda kuma yana aji uku ne (JSS-3) ya yi Shahada.”
Malam Tahir, ya shaidi Shahid Mahmud da kamewa daga shiga abin da bai shafe shi ba. “Idan yana waje in dai ba wani abu da aka sako shi ya yi magana ba, sam ko a cikin yara ba ka jin hayaniyar Mahmud. Kuma lallai ba mu san wani abokin fada ko a kawo karansa a ce ya yi fada da wani ba sam shi.
Yace, Mahmud ya kasance mai mayar da hankali sosai a kan karatunsa. “Har ma na san lokacin ya yi min alwashin cewan insha Allahu kafin shekara mai zuwa yana fatan da shi za a yi bikin yayen Mahaddata wanda za’a yi a nan Fudiyya ta Zaria. Amma Allah bai kai ga cika masa wannan burin ba ya azurta shi da kyakkyawar rabo na shahada.”
Malam Tahir ya bayyana cewa: “A lokacin da Mahmud ya yi Shahada duk mahaifansa biyu suna raye, ita mahaifiyarshi ma a lokacin shahadansa na san ni kaina da nake magana lokacin ina kwance a asibiti a Kano, sakamakon harbin da aka yi min a waki’ar, ta rika zuwa wajena ta gaishe ni har kusan sau uku, amma zuwa biyu ba ta tambaye ni labarinsa ba, sai a zuwanta na uku take tambayata ko akwai labarin Mahmud? Sai nace mata har yanzu bamu da labarinsa. Sai na ga ta yi shiru ta dukar da kai tana jan carbinta. Sannan tace min, Insha Allah in yana raye Allah ya bayyanar mana da shi kuma Allah ya bi masa hakkinsa. Ta yi ta addu’a a kan zaluncin da a ka yi mata.”
Ya ce: “matsayar mahaifinsu kuwa, lokacin da aka ce masa an kashe su, abin da ya ke cewa shine, ya tabbatar dansa addini ya ke yi, idan ya dawo ko ma in bai dawo ba, shi ya tabbatar ɗansa idan an kashe shi to an kashe shi ne a kan addini, don haka bai da damuwa.”
Yayarsa, Malama Zulaiha Ibrahim, ta labarta mana cewa: “ana saura ‘yan kwanaki zai yi shahada, bayan mun fito daga Fudiyya akwai wata jaka a hannusa da nace ya bani ina sonta. Sai yace ba zai bani ba, sai ya yi shahada. Yace idan ya yi shahada sai na je na ɗauka. Sai nace masa kai ne za ka yi shahada a hakan nan? Sai yace min to na tsaya na gani, in saurare shi na gani. Nace to Allah ya nuna mana.”
Tace: “To kawai an yi hakan da kwana biyu sai ga waki’a. To ranar waki’ar mun fito daga Fudiyya aka ce kar kowa ya fita. Sai yace shi gaskiya ba zai tsaya jira har sai an ba shi umarni sannan zai je ya ba jagora kariya ba. Sai nace masa ka bari kar ka fita. Sai yace shi lallai ba zai tsaya ba ya riga ya yi gaba. Sai nace masa to shikenan Allah ya taimaka. Yace amma dai a yayyafi juna. Sai nace Insha Allah.”
Ta cigaba da cewa: “bayan mun fito ne, su sun riga sun yi gaba, sai muka tafi Gyallesu muma. Shi Gyallesu ko Husainiyya ya tafi kai tsaye ban sani ba, amma da muka je Gyallesu, da yake an yi azumi, sai aka ce ya kawo mana abinci na je na amsa. Sai nace wata kawata ta je ta amso mana, sai ya zama dai karshen ganina da shi tun a Fudiyyah din nan ne, shikenan har yau da muke wannan maganar.”
Malam Tahir Ibrahim yace: “Bayan an tashe su daga Fudiyyah, wasu dalibai sun tafi Husainiyyah, wasu kuma suka nufi Gyallesu, to shi Shahid Mahmud na cikin wadanda suka tafi Gyallesu din, da yake yana aiki tare da ‘yan Abul Fadlul Abbas (AS), to kuma daga cikinsu wasu sun bani labarin cewa sun ga lokacin da aka harbe shi. An harbe shi a kirji har ma an ce wurin ya bude, kuma an ce an ga lokacin da aka dauke shi aka shigar da shi gidan Harisawa lokacin yana irin kakarin kamar zai yi Shahada haka a ranar Lahadi (13/12/2015) da safe.”
Allah Ya karbi Shahadarsu. Ya girmama matsayinsu. Ya tsinewa makasansu albarka.
Cibiyar Wallafa
Shahid Faisal Abdulkadir Gilima, daya ne daga matasa masu kokari, wadanda suke bayar da gudummawa ga Harkar Musulunci a Nijeriya a bangaren Mu’assasar Abul Fadl Abbas (RA).
An haif Faisal ne a garin Mubi ta jihar Adamawa, a ranar Laraba 15/5/1991 (daidai da 1 ga Zulkida, 1411H). Kasancewar mahaifiyarsa kanwa ce shakikiya a wajen dan uwa Engr. Yahya Gilima, don haka bayan rasuwar mahaifinsa a lokacin yana dan shekaru kimanin 12, sai ya dawo gidan Alhaji Gilima da rayuwa.
Lokacin da mahaifinsa ya rasu, bai kammala makarantar Firamare ba, don haka sai mahaifiyarsa Malama Amina ta tsaya a garin Mubi har sai da ya kallama Firamaren, sannan sai ta dawo wajen dan uwanta a Kaduna, inda ta danka masa rikon dan nata tun yana da shekaru 12 har zuwa lokacin da ya yi Shahada a ranar 13/12/2015 a Zariya, lokacin yana da kimanin shekaru 24 a Duniya.
Marikiyarsa, wacce ta mayar da shi tamkar daya daga ‘ya’yan da ta haifa, wato Malama Jummai Ahmad Karofi, ta bayyanawa Cibiyar Wallafa cewa; “Bayan ya dawo hannunmu da shaidar gama Firamarensa, sai muka saka shi a makarantar Sakandire mai suna Destiny School da ke unguwar Malali a Kaduna. Bayan ya kammala aji ukunsa a nan, sai muka komar da shi makarantar Federal Government College Kaduna, inda ya kammala karatun Sakandirensa a nan.”
Ta cigaba da cewa: “Daga nan, an nema masa ‘admission’ a Kaduna State Polytechnic, inda aka bashi ‘course’ din Lab Technology, amma sai ya nuna rashin sonsa ga wannan fagen, don haka daga sai muka bar shi da zabinsa, daga baya shi da kansa ya nema wa kansa ‘admission’ a Jami’ar KUDS Wudil ta jihar Kano, inda ya karanta Geography. Kuma yana ajinsa na karshe (400l) aka yi waki’ar Zariya, a lokacin ya gama karatun ma, yana kan rubuta ‘Project’ ne, suka tafi Zariya, inda kuma shikenan.”
Ta bayyana shi a matsayin yaro mai riko da addini, musamman saboda yadda ya shaku da yaronta mai suna Ibraheem, wanda shi ma ya kasance mai kokarin aikata addini tun suna yara, don haka sai ya zama Faisal na kokarin ganin ya yi koyi da yayansa Ibraheem a fagen ibada da kokari.
Tace, tun farkon assasa Mu’assasatu Abul Fadl Abbas a Zariya, da nufin taimakawa Jagoranmu Shaikh Ibraheem Zakzaky (H), a ranar da aka yi taron assasata, a ranar ta yi magana da shugaban Mu’assasar, Sayyid Shahid Ahmad Zakzaky, inda ta bukaci a sanya ‘ya’yanta guda biyu; Faisal Abdulkadir da yayansa Khalid Yahya Gilima su zama daga mambobin Mu’assasar.
An shaidi Shahid Faisal da kokarin neman na kansa da rashin kasa. “Ya kasance yaro mai kokari da son neman na kansa, domin ko a sadda ya ke karatun jami’a ya kasance yakan saro yadiddika ya bada a dinka masa sun a maza, yana saidawa.” Inji Hajiya Jummai.
Faisal ya tafi Zariya tare da ‘yan uwansa hudu a lokacin waki’ar Buhari ta 12/12/2015, inda kuma tun daga ranar Lahadi 13 ga Disambar 2015 ba a sake jin labarinsa ba, don haka ana kaddara cewa yana daya daga cikin daruruwan Shahidan da sojojin Buhari suka Shahadantar a Zariya.
Cibiyar Wallafa
-
Makaloli12 months agoLabarin Fitina Tawayiyya A Takaice
-
Labarai3 months agoJagora Shaikh Ibraheem Zakzaky Ya Isa Birnin Karbala
-
Labarai5 months agoAn Yi Taron Bikin Idil Ghadir A Abuja
-
Labarai5 months agoJagora Sayyid Zakzaky (H) Ya Yanka Ragonsa Na Layya
-
Bidiyo6 months agoShaikh Zakzaky Ya Yi Ta’aziyyar Shahadar Shugaban Iran, Ebraheem Ra’isi
-
Labarai6 months agoJagora Sheikh Zakzaky (H) Ya Gana Da Dandalin Ɗalibai A Ranar Tunawa Da Imam Khomeini
-
Labarai6 months agoA Yayin Bikin Tunawa Da Auren Imam Ali (As) Da Sayyida Zahra (As), Jagora Sheikh Zakzaky (H) Ya Gana Da Dandalin Matasan Sharifai
-
Labarai3 months agoYadda Jagora Shaikh Zakzaky Ya Yi Musharaka Da ‘Yan Uwa A Yayin Tattakin Arbaeen Zuwa Karbala
1 Comment